Veleh 25 let „Užoncah našega kraja“

Petak, 15. Prosinca 2023. - 0:00

Domoća beseda, konti, užonci našega kraja, se su to besedi ke kad hi cujemo pomislimo na jenega šloveka, našega Josipa Pina Knapića.

Kako bimo mu se zafolili za se ca je stori i za veleh 25 let „Užoncah našega kraja“ Radio Labina, danas mu je podeštot Valter Glavičić preda zahvalu.

Na svečanom prijemu u Municipie kako se to stručno rece, Pineta Knapića i Dezi Palisku s Radio Labina podeštot Labina je ugosti i preda Zahvalu za 25 let emisiji na radije ka ima svoj poseban valor. Na Zahvale piše „Zahvala Josipu Pinu Knapiću za 25 – godišnju ustrajnost u uređivanju i vođenju emisije „UŽONCI NAŠEGA KRAJA“ Radio Labina i za nemjerljiv doprinos čuvanju labinskih užonci, konti i besedah“.

„Velo fala Pino vami ali i Dezi i cele ekipe s radia ki štimote ovu našu besedu onako kako to i treba. Ono ca mi si skupa delamo i ca smo storili, jer cakavica je zaštićena i kao nematerijalno kulturno dobro RH, nešto je ca nima svoju cijenu, to je puno više od tega. To je ono naše, ono ca nosimo va srce i ono po cen smo drugošlji od seh drugeh. Naša beseda mora bit i beseda našeh nukah, pranukah i seh generacijah napred. Baš to je ona valor veći od seh beci sveta. Fala van i vele čestitki za 25 let emisiji ku si joko radi slušamo.“ – reka je podeštot Valter Glavičić